Ekkert kemur af engu.

Ef þið viljið undirbúa ykkur fyrir tillögurnar þá skulið þið lesa áfram.
það er eins og almenningur og fjölmiðlar haldi að það sem kynna á fyrir okkur landslýð á morgun sé eitthvað sem enginn veit hvað hafi að geyma eða á hvaða grunni það sé unnið eins og það sé hulið leyndarhjúp. Svo er ekki því allt sem ríkisstjórnir gera er unnið eftir áætlunum. 
Ég skil að almenningur viti ekki betur en ég skil ekki að fjölmiðlafólk viti ekki af því að þetta er allt unnið út frá forsendum sem löngu eru kunnar en kannski er hér komin skýringin á því hvers vegna fjórða valdið, svokallaða, er ekki að standa sig betur en raun ber vitni sem skýrir aftur hvers vegna almenningur er ekki nógu vel upplýstur. 
Málið er að þingsályktunartillaga Forsætisráðherra sem samþykkt var á sumarþinginu er uppskriftin af skuldaleiðréttingarferlinu og öðru því sem á að kynna fyrir okkur á morgun vegna skuldavanda heimila á Íslandi. 
Hér fyrir neðan má lesa hana, bendi ég ykkur sérstaklega á að lesa greinagerðina sem kemur á eftir og skýrir út hvern lið tillögunnar:http://www.althingi.is/altext/142/s/0009.html 
Vitið þið að ég og við í Hagsmunasamtökum heimilanna lúslásum þessa þingsályktunartillögu í sumar og skiluðum inn umsögn um hana. Í umsögninni sögðum við meðal annars að hún væri um margt ágæt en það væri mjög margt sem væri ekki nógu gott og einnig að það væri mjög margt sem vantaði alveg í tillöguna. 
Það sem okkur fannst aðallega vanta eru aðalmálin fyrir heimili landsins og fjölskyldur og er þar fyrst að nefna að skuldavandinn er í raun ekki aðalvandi okkar Íslendinga heldur er það framfærsluvandinn eða með öðrum orðum FÁTÆKT sem er aðalvandi okkar og ekkert er minnst á en hann setur okkur alltaf aftur og aftur í skuldavanda alveg sama hvað leiðrétt verður oft hjá okkur skuldirnar og þá sérstaklega í því verðtryggða neytendalánaumhverfi sem okkur hefur verið boðið upp á. Það þarf að finna út, eins og gert er í öðrum löndum sem við miðum okkur við, hvað það kostar að lifa hófsömu mannsæmandi lífi og stilla svo þjóðfélagið eftir því. 
Hitt aðalmálið sem okkur finnst ekki vera tekið á í tillögunni er að það vantar alveg að fjalla um heitustu kartöfluna í Íslensku þjóðfélagi í dag sem er að verðtrygging neytendalána er og hefur verið ólöglega útfærð frá 2001 að minnsta kosti að okkar mati eins og við höfum nú kært og bíður dóms. Ætlum við í HH ekki að fara með okkar mál fyrir EFTA dómstólinn því við ætlumst til að Íslenskir dómarar dæmi eftir Íslenskum lögum sem eru mjög skýr varðandi þetta atriði. Þegar sá dómur fellur þá er í raun skuldavandi heimilanna leystur og það á miklu, miklu betri hátt og með miklu meiri lækkun en núna er verið að ræða ef miða má við fréttir og tillöguna eins og hún tekur á málinu. Einnig má nefna að þegar dómurinn fellur þá verða bankarnir að leiðrétta lánin á sinn kostnað eins og þeir þurftu að gera þegar dæmt var að gengislánin svokölluðu væru ólögleg. Mér finnst ég ekki þurfa að minnast á að auðvitað þarf að afnema verðtryggingu af neytendalánum til framtíðar, það er svo sjálfsagt.
Það sem ég hræðist mest áður en tillögurnar verða kynntar á morgun, hinn 30 nóvember 2013, er að það er verið að tala um að semja við kröfuhafa um að fá frá þeim silfurpeninga til að leiðrétta lánin og einnig einhverja silfurpeninga til að lækka skuldir ríkissjóðs þannig að báðir flokkar geti sagt að þeir séu að uppfylla kosningaloforð sín. Hræðsla mín snýr að því að kröfuhafar bankanna og þeir sem vilja fá að klára skilin á milli gömlu og nýju bankanna semji um þessa silfurpeninga og smápeninga við ríkisstjórnina og fái í leiðinni að fara með restina af gróðanum úr landi. Þá fyrst erum við sem þjóð í vanda því þegar dómurinn um að verðtrygging neytendalánanna okkar sé og hafi verið ólöglega útfærð frá 2001 kemur, eru hrægammarnir skellihlægjandi að baða sig í peningunum okkar einhvers staðar í heitu umhverfi og ekkert hægt að sækja leiðréttingarnar til þeirra og þá loksins verður ríkissjóður ábyrgur sem er það sem við í HH höfum alltaf verið að berjast fyrir, að ríkið verði ekki ábyrgt heldur hrægammarnir svokölluðu.
Veit að þetta er langt en ef þú hefur lesið þetta hingað til hefur þú virkilegan áhuga á hag íslenskra heimila og er vonandi að sem flestir fari nú að berjast fyrir bættum hag heimilanna og við hættum að láta fara með okkur eins og niðursetninga.
Ef tekið er á öllu því sem við settum fram í umsögn okkar í HH við þingsályktunartillöguna eða jafnvel gengið lengra til varnar fjölskyldunum þá skal ég vera fyrsti maður til að óska ríkisstjórninni til hamingju á morgun, en ég óttast að þetta verði ekki svo gleðilegur dagur. 
Vonandi eru þessi skrif mín óþörf og tekið verður á öllu því sem er í umsögninni okkar í HH og meira til því vonin er að deyja hjá íslensku þjóðinni. 
p.s. set umsögnina okkar í HH við þingsályktunartillöguna hér fyrir neðan og hvet ég ykkur til að lesa hana líka því þar er sett fram á vandaðan hátt hvað þarf nauðsynlega að gera fyrir heimilin í landinu sem ég óttast að sé ekki tekið á í tillögum ríkisstjórnarinnar.  http://www.althingi.is/pdf/erindi/?lthing=142&dbnr=57  

Leyndinni aflétt í Hörpu