Ósk um ábyrga fréttamennsku.

Á þessum ólgu og óvissutímum hlítur að vera hægt, ef einhvern tímann, að gera þá kröfu til fjölmiðla að þeir vandi fréttaflutning sinn af jafn viðkvæmum málum og húsnæðismarkaðurinn er í dag. Að setja þessa fyrirsögn á þessa frétt er fáránlegt og mbl.is ekki boðlegt að mínu mati. Ég hef hingað til verið þokkalega sáttur við fréttir mbl.is af þessum málaflokki og þó að þessi tiltekna frétt sé komin úr 24 stundum þá finnst mér mbl.is setja niður við svona æsifréttar fyrirsagnarstíl. Við höfum sorpblað sem hefur hingað til verið einrátt á þeim markaði og vona ég að 24 stundir séu ekki að fara í þá áttina með nýjum mönnum í brúnni.  

Engin lán á ný hús

Athugasemdir

[Karl (IP-tala skráð) 11.6.2008 kl. 12:12]

Hvað er rangt við fréttina? Viltu ekki upplýsa lesendur um það? Ég er amk engu nær eftir að hafa lesið athugasemd þína.

[S F (IP-tala skráð) 11.6.2008 kl. 12:32]

 Rétt málfar er að setja ofan = verða sér til hnjóðs. Aftur á móti setur maður niður kartöflur

 Að öðru leyti er ég sammála.

[Jón Gunnar (IP-tala skráð) 11.6.2008 kl. 12:33]

Hver er maðurinn ?

Ertu etv. fasteignasali? Þeir hafa ekki viljað taka mikla ábyrgð á sínum þætti í þessari húsnæðiskreppu. Ekki höfðu þeir áhyggjur þó að fasteignaverð hækkaði um tugi prósenta á skömmum tíma. 

[Vilhjálmur Bjarnason Ekki fjárfestir, 11.6.2008 kl. 13:44]

Svar við athugasemdum.

1: Sæll Karl, það kemur fram í textanum, " Að setja þessa fyrirsögn á þessa frétt er fáránlegt og mbl.is ekki boðlegt að mínu mati ". Það kemur nefnilega hvergi fram í fréttinni að íbúðalánasjóður sé hættur að lána til nýrra húsa. Takk samt fyrir athugasemdina, þetta var kannski ekki sett nógu skýrt fram hjá mér. VB

2: S F. Takk fyrir ábendinguna, svona eftirá sé ég að ég hef heldur ekki sett ý í hlýtur, reyni að bæta mig í stafsetningunni. VB

3: Sæll Jón Gunnar. Vilhjálmur Bjarnason heiti ég og er löggiltur fasteignasali og hef verið starfandi á fasteignasölunni Húsið síðustu 16 ár eða svo. Þú getur kannski skýrt út fyrir mér hver þáttur löggiltra fasteignasala er í þessari húsnæðiskreppu að þínu mati. Þú sendir mér kannski líka línu um það af hverju löggiltir fasteignasalar hefðu átt að hafa áhyggjur af hækkandi húsnæðisverði, þú ert greinilega vel inní þessum málum sé ég.

Ég vil nú líka minna á að fasteignasalar eru líka fólk, fólk sem á fjölskyldur, íbúðir og síðast en þó ekki síst lán og skuldir eins og annað fólk og það gefur mér, allavega að mínu mati, rétt til að óska eftir að fréttaflutningur að þessum málum sé ábyrgur hjá mbl.is en ekki eins og maður sé að lesa DV.  VB

[Karl (IP-tala skráð) 11.6.2008 kl. 14:10]

Sæll Vilhjálmur. Takk fyrir svarið. Ég hef nú lesið fréttina aftur og er þér sammála. Fyrirsögnin er ekki í neinu samræmi við fréttina. Þetta er auðvitað alveg ótrúleg fréttamennska, eiginlega algjört drasl. Hvað er í gangi? Kveðja. Karl

[Karl (IP-tala skráð) 11.6.2008 kl. 14:43]

Hvað segir blaðið? Stendur ekki til að leiðrétta þetta? Þú hlýtur að hafa haft samband við blaðið?

[Úlfur (IP-tala skráð) 11.6.2008 kl. 15:44]

Ég er þér sammála Vilhjálmur. Þetta er asnalega framsett, og mér finnst vera svolítil "off the record"-lykt af þessu. Tek fram að ég er líka í bransanum (Borgir) en ekki löggiltur.

Varðandi ásökun Jóns Gunnars hér fyrir ofan bendi ég á að auk stóraukins lánsframboðs síðustu ára er græðgi sveitarfélaga við lóðasölu mikill sökudólgur varðandi verðhækkanirnar. Ennfremur er hinn tiltölulega nýtilkomni skortur á lánsfé alþjóðlegur vandi, ekki séríslenskt fyrirbæri. Fasteignasalar eru mjög valdalitlir hvað þessa hluti varðar og hafa lítil sem engin áhrif á neinn þessara þátta.

[Ingi Björn Sigurðsson, 11.6.2008 kl. 18:28]

Ég verð að viðurkenna að ég áttaði mig ekki á þessari fyrirsögn eftir lestur fréttarinnar. Kannski hefði rétta fyrirsögnin verið "Hrun á íbúðarmarkaði yfirvofandi" eða "Steinsteypu hagkerfið að hruni komið".